Кажете „не“ на јадењето  

По серијата кампањи што ги навестија прекрасните закони што ни „подарија“ сѐ нови и нови слободи, ни преостануваат уште само неколку за да станеме вистински надлуѓе. Но, чекор по чекор. Одиме со првата.

Оваа кампања е против јадењето. Јас, уште еднаш, си зедов слобода, без надоместок, да им помогнам на рекламните агенции во креирањето на првата реклама од кампањата. Во секој случај, полоша од сегашниве, не може да биде.

(Човек стои во потполно мрачна соба. Единствено тој е осветлен од рефлектор директно над него. Стои збунет и се чеша на главата)

Дневно трошите во просек 300 денари на храна (морничава музика, по можност „Токата и фуга“ отсвирена на евтин синтисајзер);

Месечно, тоа се 9000 денари (гореспоментата морничава музика продолжува);

Годишно, за јадење, во неповрат ви одат преку 108 илјади на нешта кои и онака ги исфрлате од себе за најмногу еден ден (одново морничавата музика тече);

Па, ако вашето дете ви побара пари да заврши уште еден факултет и во следниот киоск, а вие му речете дека немате, тогаш или сте лош родител или не ви оди математиката (инспиративна музика, по можност "Amazing Grace" oтсвирена со истиот евтин синтисајзер);

(Затемнување, неколку секунди молк, а потоа одново продолжува рекламата. Човекот и натаму се чеша на главата)

Како директна последица на секојдневното конзумирање храна се јавуваат: прекумерна тежина, покачен крвен притисок, срцеви заболувања, респираторни проблеми, дијабетес, во некои случаи и гангрена....

(интермецо со морничава музика, па преод кон инспиративната музика)

Тогаш зошто не престанете да јадете? Вашето тело, а и вашите деца ќе ви бидат благодарни.

По дистрибуцијата на приложениот постер, ќе се воведе и забрана за продажба на храна по 19 часот.